දිවියේ ආශා ගැඹුරින් ගැඹුරේ,
ලයගින් සනහා අපමයි තැවුනේ,
ජන්මෙන් ජන්මේ රැව්දීලා,
ඔබ මා නෙතඟේ රැඳුනා...

මම කැමති සිංදු 10ක් | 10 Songs I Love

ෆෝන් එකෙන්, කොම්පියුටරෙන්, බස් එකේ හරි වාහනේක හරි යද්දි ඒකේ රේඩියෝ එකෙන් අහන/ඇහෙන ගීත ගොඩක් ඒවා යන්තමින් හරි මතක හිටිනවා. ඒ ගීත අතරින් කැමතිම ගීත 10ක් විතරක් තෝරන එක කරන්න පුළුවන් වැඩක් නෙමෙයි. ඒත්, යම් උත්සාහයක් දැරුවා ඒ වෙනුවෙන්. මේ අනුපිළිවෙල කැමතිම අනුපිළිවෙල නෙමේ. මතකෙට ආව අනුපිළිවෙල

කිව්වොතින් නිවැරදියි...

1. සඳමිතුරී - කසුන් කල්හාර

මීට අවුරුදු ගාණකට කළින් ඉඳලා අද වෙනකම්ම මම කැමතිම ගීතය. මේක දෙමළ සිංදුවක රීමේක් එකක් කියලා බොහෝ දෙනෙක් කිව්වට, මට මේ ගීතය බොහොම ආදරණීයයි. දැනට දහස්පාරකට වඩා අහලා ඇති. ඒත් කවදාවත් මේ ගීතයේ වචන මතක නැහැ. ඒකට හේතුව මේක අහද්දි හිතෙන් මම වෙනම ලෝකෙකට යනවා. ආයේ පියවි සිහියට එන්නේ ගීතය ඉවර උනාට පස්සේයි. එහෙම දැනෙන ගීත හරි අඩුයි.

2. මට රවනා - ලහිරු පෙරේරා

නව පරපුරේ ගායකයන්ගෙන් මම කැමතිම ගායකයා තමයි ළහිරු පෙරේරා. ළහිරු පෙරේරාගේ මේ ගීතයත් මම බොහොම කැමති එකක්. මහ තේරුමක්වත් සුපිරි මියුසික්වත් නොතිබුණාට මේ ගීතයේ තියෙන සංගීත සංයෝජනය ඉතා ඉහළයි. මට සෑහෙන්න දැනෙන ඒ වගේම නිතරම මුමුණන ගීතවලින් එකක් මේක.

3. දස බිම්බර මාර සෙනඟ - සෝමතිලක ජයමහ ශූරීන්

මම කැමතිම බොදු බැතිගීය තමයි මේ ගීතය. මේ ගීතයත් එක්ක මැවෙන විත්ත රූපය මහ අමුතුම එකක්. මේ ගීතය මගේ හිතේ හැමදාම තියෙන ගීතයක් වෙන්න සෝමතිලක ජයමහ මහතාගේ ලයාන්විත ගායනය අනිවාර්ය හේතුවක්.

 
4. සසර සැරිසරන තෙක් - වික්ටර් රත්නායක

මම කැමතිම ප්‍රේම ගීතය තමයි මේ සිංදුව. මේ සිංදුව මුලින්ම ගායනා වෙද්දි මම දන්න තරමින් මම ඉපදිලත් නැහැ. නමුත් අද මගේ ජීවිතේ 3වෙනි දශකය ගෙවද්දිත් මට මේ සිංදුව විඳින්න පුළුවනි. ඒ තරමට මේ ගීතය මාරම ලස්සනයි. මේ ගීතයේ ඔරිජිනල් එකට වගේම Dell Studio එකේදි අලුතෙන් කරපු එකටත් එක වගේ කැමතියි.

5. Gimme Hope Jo'Anna - Eddy Grant

මෙ ගීතය මට මුලින්ම ඇහෙන්නේ 1990දී විතර. ගීතයේ කිසිම දෙයක් තේරුණේ නැතත් ඒකේ සංගීතය මගේ හිතේ සදහටම තැන්පත් වෙනවා. ආයේ මේ සිංදුව අහම්බෙන් ඇහෙන්නේ 2007/08 කාලෙදි. එදා ඉඳලා අද වෙනකං මම හැමදාම අහන සිංදු එකතුවේ මේ ගීතය තියෙනවා.

මේ ගීතය පදනම් වෙන්නේ දකුණු අප්‍රිකාවේ (ගීතය නිකුත් කරපු කාලේදී දැඩිව තිබුණ) වර්ණබේදවාදය පිළිබඳව. වර්ණබේදවාදය හරහා කළු ජාතිකයන්ව පාගලා දාන හැටි සහ කළු ජාතිකයන් නැගිටින්න හදන හැටි ගැන බොහොම ලස්සනට මේ ගීතයෙන් කියවෙනවා. මට මේක All Time ගීතයක්.

6. සුවඳ දැනී දැනී දැනෙනවා - රූකාන්ත ගුණතිලක

මේකත් මම බොහොම කැමති ප්‍රේම ගීතයක්. මාව වෙනම ලෝකෙකට ගෙනියන්න මේ සිංදුවටත් මාරම හැකියාවක් තිබෙනවා. Dell Studio වර්ෂන් එකට තමයි කැමතිම.

7. තෙරේ බිනා [Tere Bina] - ඒ. ආර්. රහුමාන් | චිනාමයී

2007 අවුරුද්දෙදි එළිදක්වපු මනිරත්නම්ගේ ගුරු චිත්‍රපටියේ තිබෙන ගීතයක් මේක. මේ ගීතයේ සංගීත සංයෝජනය සහ ගායනය කියන හැම දේම විශිෂ්ඨයි. සංගීතවත් කරලා තියෙන්නේ ඒ. ආර්. රහුමාන්. ගායනය කරන්නේ රහුමාන්, චින්මයී, මුර්ටුසා කාන්, ක්වාදීර් කාන් යන පිරිස. මම බොහොම කැමති හිංදි ගීතයක් මේක.

8. Firework [Katy Perry] cover by Karmin

කේටි පෙරී කියන ඇමරිකානු පොප් ගායිකාව මුල් ගායනය කරපු ගීතය, Karmin කියන සංගීත කණ්ඩායම විසින් cover එකක් විදියට නිකුත් කරනවා. මේ Cover ගායනයට තමයි මම කැමතිම. මුල් ගායනයට වඩා Cover එකෙන් මේ ගීතයට විශාල සාධාරණයක් කරලා තියෙනවා කියන එකයි මගේ අදහස. මේ ගීතයේ පද මාළාව බොහොම ප්‍රභලයි. ඒ ප්‍රභලකම බොහොම අපූරුවට Karminලා හරහා එළියට එනවා.

9. Love The Way You Lie - Eminem ft. Rihanna

රැප් සිංදුවලින් මම කැමතිම සිංදුව මේක. මතුපිටින් බොහොම සරළ ගීතයක් කියලා හිතුනට රැප් එකේ වචන අතර එහා මෙහා යද්දි ඒකේ ලොකු කතාව දැනෙන්න පටන් ගන්නවා. ඒ අකුරුවලට Eminem පණ පොවන විදිය විශිෂ්ඨයි. බොහොම දරුණු විදියට අපේක්ෂා භංග වෙලා ඉන්න ප්‍රේමවන්තයෙක්ගේ හැඟීම ඔහු බොහොම අපූරුවට එළියට ගේනවා. ඒක මහ අමුතුම හැකියාවක්. වේගරිද්ම සංගීතය එක්ක Eminemගේ බලපොරොත්තු කඩවුන, කෝපයෙන් දැවෙන හඬ සහ Rihannaගේ ශෝකාකූල හඬ බොහොම හැඩට ගැලපෙනවා.

10. Smells Like a Teen Spirit [Nirvana] - Violin Cover by David Garret

Nirvana Rock Band එකේ නායක Kurt Cobianගේ Smells Like a Teen Spirit ගීතය ලෝක රොක් සංගීත ඉතිහාසයේ ඉහළම තැනක තියෙන ගීයක්. හැබැයි ඒ ඔරිජිනල් ගීතයට වඩා මම කැමතිම David Garret කියන ජර්මානු වයලීන් ශිල්පියාගේ Violin Cover එකට. Cobianගේ ගීතය ඔහු වයලීනයෙන් ආයෙත් ප්‍රතිනිර්මාණය කරන අපූරුව වචනයෙන් ප්‍රකාශ කරන්න මගේ සිංහල දැනුම ප්‍රමාණවත් නැහැ. ඒ ප්‍රතිනිර්මාණය ඒ තරමටම විශිෂ්ඨයි. ඒ වගේම ප්‍රභලයි. ඇඟේ ඇඩ්‍රිනලීන් වැඩිකරගන්න ඕනේ වෙලාවට මම නොවැරදීම අහන සංගීතයක් මේ.

මීට අමතරව අමිල නිදහසගේ "Black Male", වික්ටර් රත්නායකයන්ගේ "දාගැබ් මහා වැව් බැන්දේ නුඹයි පුතේ", Enrique Iglesiasගේ "Hero", "Somebodys Me", ජගත් වික්‍රමසිංහගේ "සුදු රුවිනී", කසුන් කල්හාරගේ "තරු කැටයක් වී", සේනානායක වේරලියද්දගේ "සාගරය බඳු වේදනාවෝ [Dell Studio]", "මීන නුවන් යුග [Dell Studio]" වගේ ගීත මේ ලිස්ට් එකට එකතු විය යුතුමයි.

මම මුලිනුත් සඳහන් කරපු විදියට මේ ගීත ලැයිස්තුව බොහොම අසම්පූර්ණ උත්සාහයක්. නමුත් නිකමට හරි මෙහෙම ලැයිස්තුවක් හදාගෙන තියෙන එකේත් නරකක් නැහැ.

අන්තරේ ළමයින් වෙත කරුණාවෙන්....

රජයේ අමාත්‍යංශයකට බලහත්කාරයෙන් ඇතුළු වී එහි පරිපාලනයට බාධා කරනවිට රජයේ හමුදාවන් හෝ පොලීසිය පැමිණ ඔබට ධර්මය දේශනා කර සාමකාමීව ඔබව එයින් ඉවත් කරාවියි කියා ඔබ හිතනවානම්, මට කියන්නට තියෙන එකම දෙය වන්නේ කරුණාකර සිහිනෙන් අවදිවෙන්න ළමයිනේ කියා ය. මේ රටේ හෝ මේ ලෝකේ කිසිම තැනකදී එහෙම වෙන්නේ නැත.

නුඹලා ඊයේ දවසේ සිදුකරනු ලැබූ ක්‍රියාව අත්‍යන්තයෙන්ම වැරදි ය!!! ඒ ගැන කිසිම කතාවක් නැත. නුඹලා විසින් ඔය ඉතාම ක්‍රමානුකූලව සිදුකරනු ලබන්නේ නුඹලා පෙනී සිටින කරුණ වෙනුවෙන් ඇති ජනතා සහය නැතිකරගැනීම පමණකි. පොදු මහ ජනතාවගේ සහයකින් තොරව පොදු සටන් ජයග්‍රහණය කළ නොහැකි බව නුඹලාට යළි මතක් කරමි. ඔය සටන් උපක්‍රමය මේ සටනේදී ඵලදායක වන්නේ නැත!!!

ඊයේ දවසේ ඒ සිදුවීමත් සමඟම අත්දකින්නට ලැබුණ අනිත් ජුගුප්සාජනකම කරුණ වන්නේ මීට වසර තුනකට හතරකට පෙර, නුඹලාගේ උද්ගෝෂණවලට පොලිස් ප්‍රහාර එල්ලවීමේදී ෆේස්බුක් අවකාශය පුරා කඳුළු වගුරවමින් හඬා වැළපුණු සහ ඒ දේවල් හුවා දක්වමින් #යහපාලනයක් ගෙන එන්නට කැපවුනු හොරිකඩ තුප්පහි අමන හැතිකරේ වර්ථමාන ක්‍රියාකාරීත්වයයි. නුඹලාට පහර දුන් පොලිස් නිලධාරීන්ට වඩා සතුටක් ඔවුන් ඒ පහරදීමේ ඡායාරූප/වීඩියෝ හරහා ලබනා වග ඔවුන්ගේ ප්‍රකාශයන්ගෙන් පිළිබිඹු වෙන බව නුඹලාත් දකින්නට ඇතැයි සිතමි. උං සැබවින්ම නියෝජනය වෙන කඳවුර කුමක්දැයි නුඹලාට පැහැදිලි ඇතැයි සිතමි. ඊට එහා ඒ ගැන කතාකිරීමවත් අනවශ්‍ය බව මගේ අදහසයි...

නුඹලාගේ සයිටම් සටන සාධාරණ බව යළිත් කියමි. සටන සාධාරණ නමුත් සටන් ක්‍රමවේද අසාධාරණනම් ඒ සාධාරණ සටනෙන් ඵලක් නැතිබව යළිත් කියමි.

සයිටම් විරෝධී සටනේදී අපි තවමත් සිටින්නේ නුඹලාගේ කඳවුරේ බව කියමි. නමුත් නුඹලාගේ මේ ක්‍රියාකාරීත්වය නිසා නුඹලාට අපේ කුලකයේ බොහෝ දෙනෙකුගේ සහය ක්‍රම ක්‍රමයෙන් අහිමිවෙන බව පමණක් අවසාන වශයෙන් සඳහන් කරමි.

නුඹලාගේ සයිටම් විරෝධී සටන දිනේවා!!!

ඔබට සුබ උපන්දිනයක් වේවා | Wish You a Very Happy Birthday Sir

මගේ මතකය නිවැරදි නම්, මම ඔබ ගැන මුලින්ම දැනගන්නේ 2006 දෙසැම්බර් පළමුවැනිදා. ඒ කොල්ලුපිටිය පිත්තල හංදියේදී ඔබට එල්ලවූ මරාගෙන මැරෙන බෝම්බ ප්‍රහාරයේ විස්තරයත් සමඟයි. ඒ වෙද්දී ඔබ ඔබගේ ධූරයේ එනම් "ආරක්ෂක අමාත්‍යංශයේ ලේකම්" ධූරයේ වැඩ භාරගෙන හරියටම අවුරුද්දක්. ප්‍රභාකරන් ආවට ගියාට මරාගෙන මැරෙන බෝම්බකරුවන් දේශපාලන ඉලක්ක වෙත එවන එකෙක් නෙමෙයි. නමුත් ඔබ වෙනුවෙන් ඔහු බෝම්බකරුවෙක් එවනවා. ඒ ඔහුගේ ගමනට ඔබ මහා බාධාවක් බව අවුරුද්දක් යද්දීම ඔහුට දැනුන නිසා යි. ඉන් එහාට 2009 මැයි 18 වෙනකම් කාලය අයිති වන්නේ ඉතිහාසයට යි. අවුරුදු 30ක් මේ රට වසාගෙන සිටි ත්‍රස්තවාදය මුලින් උපුටා දැමූ ඒ වසර කීපය ගැන ඉතිහාසය හැමදාම සාක්ෂි දරයි.

 ඉන්පසුව මම යළිත් ඔබව දකින්නේ 2010දී "රාජ්‍ය ආරක්ෂක සහ නාගරික සංවර්ධන අමාත්‍යංශයේ ලේකම්" ලෙස යි. කිසිදා සුව නොවෙන තුවාලයක් විදියට අපි දැකපු කොළඹ නගරයේ පදික වේදිකා වෙළඳාමේ ගැටළුවට ඔබ මැදිහත්ව "ස්ථිර" විසඳුමක් ලබාදෙන විදිය මම දැක්කා. කොළඹ නගරයේ තිබුණ ගරා වැටුන ගොඩනැගිලි, පදික වේදිකා, උයන්වතු සහ තවත් බොහෝ තැන් නව පෙනුමක් ලබාගෙන, තිරිහන් වෙලා ජනීජනයා ගැවසෙන සහ සංචාරක ආකර්ශනය හිමිවෙන තැන් බවට පෙරලෙන ආකාරය මම දැක්කා. රටේ අග නගරය දැඩිව වෙළාගත් කුණු ප්‍රශ්නය ක්‍රම ක්‍රමයෙන් විසඳෙන ආකාරය මම දැක්කා. ගෝඨාභය කියන්නේ යුද්ධෙ විතරක් නෙමේ වෙන ඕනෑම වැඩක් දන්න, වැඩේ හරියට කරන පුද්ගලයෙක් බව ඔබ ක්‍රියාවෙන්ම ඔප්පු කරන ආකාරය මම හොඳින්ම දැක්කා.

විවිධාකාර පුද්ගලයන් විවිධාකාර අවකාශවල, වේදිකාවල ඔබට කරන චෝදනාත් මම දැක්කා. මිනී මෝරුන්, සුදු වෑන්, අතුරුදහන් කිරීම් පිළිබඳව චෝදනාවන් දහස් ගණනක් ඒ මේ අත පාවෙනු වසර ගණනාවක සිටම මම දැක්කා. අද ඔබ රාජ්‍ය ආරක්ෂක සහ නාගරික සංවර්ධන අධිකාරියේ ලේකම් ගෝඨාභය රාජපක්ෂ නෙමේ. නිකංම නිකං ගෝඨාභය රාජපක්ෂ. නමුත් අදටත් ඔබට විරුද්ධව ඇති ඒ චෝදනා එකක්වත් ඔප්පුකරගන්නට ඒ චෝදනාකරුවන්ටවත් ඒ චෝදනා සමාජගත කළ පුඟුලන්ටවත් හැකිවී නැති බවත් මම දකිනවා. හෙටත්, තව අවුරුදු 10කිනුත් ඒ චෝදනා හිස් වචන පමණක් ලෙසින් අවකාශයේ තැන් තැන්වල තිබෙනු ඇතැයි කියන එකයි මගේ විශ්වාසය. මේ ලෝකය කැරකෙන්නේ ඒ විදියට බව ඔබ දන්නවා ඇති. වැඩක් කරන මනුස්සයාට සහයට සිටින්නේ එකෙක් විතරක් වෙනකොට, ඔහුට විරුද්ධව 10ක් ඉන්න එක මේ ලෝකේ කවදාවත් වෙනස් නොවෙන ඇත්තක්.

ඔබ බලවත්ව සිටි කිසි දවසක මම ඔබ වෙනුවෙන් එක අකුරක්වත් ලිව්වේ නැහැ. එදා ඔබට ප්‍රශස්ති ගැයූ, ඔබ වෙනුවෙන් පෙනී සිටි බොහෝ දෙනා අද ඔබ සමඟ නැහැ. නමුත් අද ඔබ වෙනුවෙන් මම මගේ අකුරු වෙන් කරන්නේ බලය තිබුණත් නැතත් ඔබ මේ රටේ ජනතාව විසින් රැකගැනීමට අවශ්‍ය චරිතයක් බව මම විශ්වාස කරන නිසාමයි.

මගේ ජීවිත කාලය තව අවුරුදු 30කින් 40කින් ඉවර වෙයි. ඒ වෙද්දි මේ තියෙන තත්ත්වෙන් මේ රට ඉඳිරියට ගිහින් තියෙනවා දකින එක මගේ සිහිනයක්. මගේ ඒ සිහිනය මහපොළොවේ යථාර්ථය බවට පත්කරන්නට හැකි පුද්ගලයා ඔබ බවට මට තියෙන්නේ දැඩි විශ්වාසයක්. ඔබ මේ රටට අවශ්‍ය චරිතයක්. ගෝඨාභය රාජපක්ෂ මහතාණෙනි, ඔබට සුබ උපන් දිනයක්. චිරං ජයතු!!!

පෙම රසයි රසයි, රහසින් හන්දා...

සසරක යන වග,
දැනගත යුතු මග,
කොතනක ඉම...

දැනුනත් නොදැනී,
හැඟුනත් නොහැඟී,
ඉමු අපි, අද වී...

සෙනෙහෙන් ඉපිලී - හැඟුමන් ඉතිරී,
ප්‍රේමය රස වූ - දසතේ පවුරූ,
රහසින් හන්දා...

මලකුත් තිබුණා,
හැඟුමන් හංගා,
එය හඳුනාගත් බඹරෙකු රිංගා...
වෑකුළු උයනේ දොරගුළු බින්දා
පෙම රසයි රසයි, රහසින් හන්දා...
රහසින් හන්දා....

අනෝරා වැස්ස පරයන කරුණාවේ පියැස්ස

මීට සුමාන දෙකකට කළින්, රටෙන් දිස්ත්‍රික්ක අටක් සහ ඒ දිස්ත්‍රික්ක අටේ වාසය කරන ලක්ෂ කීපයක ජනතාවක් විපතට පත්වුනේ පැය කීපයක කාලයක් ඇතුළේදීයි. ඒ අයහපත් කාළගුණය හේතුවෙන්. ඉතිහාසයේ සිදුවෙච්ච විශාලතම ස්වභාවික ව්‍යසනයන් කීපයෙන් එකක් වෙච්ච ඒ ගංවතුර සහ නායයෑම් හේතුවෙන් ජීවිතයෙන් සමුගත්ත සංඛ්‍යාව දෙසීයකට අධිකයි. සම්පූර්ණයෙන්ම හානි වූ නිවාස ගණන, හානි වූ දේපොළවල වටිනාකම්, තාම ගණන් බලලා ඉවර නැතුව ඇති. 

මේ මහා ස්ව්භාවික ව්‍යසනය එක පැත්තකින් සිදුවෙද්දි, එයින් ආපදාවට ලක්වූවන්ට සහන සැළසීම වෙනුවෙනුත් පෙරට ආවේ මේ රටේ ජනතාවම තමයි. තමන්ගේ ආහාර වේලේ ඉඳන් පරිත්‍යාග වශයෙන් ලබාදෙන්න පුළුවන් සියළුම දේවල් තමන් ඇහැටවත් දැකලා නැති ජනතාව වෙනුවෙන් මේ රටේ මිනිස්සු ලබාදුන් හැටි අපි පහුගිය කාලේ අන්තර්ජාලය සහ ප්‍රධාන මාධ්‍ය තුළින් නිරන්තරයෙන් දැක්කා. ඒක තමයි ශ්‍රී ලාංකිකයන්ගේ හැටි.

රද්දොළුගම බෞද්ධ මහා සංගමයේ මූලිකත්වයෙන් රද්දොළුගම 82' Alliance සමාජය, රද්දොළුගම තුළ ක්‍රියාත්මක වෙන සියළුම සුබ සාධක සංගම් සහ අනෙකුත් සංවිධාන, රද්දොළුගම පොලීසිය යන මේ සියළුම දෙනා එක්ව මේ ආකාරයේම භාණ්ඩ එකතුකිරිමේ වැඩසටහනක් ක්‍රියාත්මක වුනා. රද්දොළුගම නිවාස සංකීර්ණයේ සහ රද්දොළුගම අවට ගම්මානවල වාසය කරන අනෙකුත් ජනතාවත්, රුපියක් ලක්ෂ කීපයක වටිනාකමකින් යුත් වියළි ආහාර, පානීය ජලය, මෙට්ට, රෙදිපිළි, සනීපාරක්ෂක ද්‍රව්‍ය සහ අනෙකුත් නිවසකට අවශ්‍ය ද්‍රව්‍ය අප වෙත ගෙනැවිත් භාර දුන්නේ මේ අභාග්‍යසම්පන්න අවස්ථාවේදී තමන්ගේ යුතුකම පැහැර නොහරිනබව මොනවට පසක් කරමින්.

දවස් 9ක කාලයක් තිස්සේ එකතු කරපු ඒ භාණ්ඩ, නායයෑමෙන් සහ ගංවතුරෙන් දැඩිලෙස විපතට පත් මාතර මොරවක කන්ද සහ කොටපොළ ප්‍රදේශයේ ග්‍රාමනිලධාරී වසම් කීපයක ජනතාව වෙත බෙදාදීම සඳහා දින නියම වුනේ පසුගිය ජූනි මස 11වෙනි ඉරිදා. එදා හිමිදිරි පාන්දරම රද්දොළුගමින් පිටත් වෙන ආධාර රැගත් ලොරි රථ දෙක උදෑසන 10 පමණ සිට මොරවක කන්ද, උසමළගොඩහේන, ලිඳගාවහේන කොටපොළ උතුර, කොටපොළ දකුණ යන ප්‍රදේශවල ජනතාව වෙත තමන්ගේ සහෝදරත්වයේ ආධාර ලබාදුන්නේ ඒ ජනතාවගේ සිතට යම් හෝ සැනසිල්ලක් ගෙන දෙමින්. ඔවුන්ට නැතිවූ දේවල් මේ පරිත්‍යාගයන්ගෙන් ලැබෙන්නේ නැහැ. ඒ අඩුව පුරවන්න අපිට කවදාවත් බැහැ. නමුත්, මේ විපත්තිදායක අවස්ථාවේදී ඔවුන්ගේ හයියට අපිත් ඉන්නවා කියන පණිවිඩේ ඔවුන්ට මහ මෙරක්.

 
මේ මහා සමාජ සත්කාරයට නන් අයුරින් දායක වූ සියළුම දෙනාට අපේ ගෞරවණීය ස්තූතිය පුදකිරීමට මෙය අවස්ථාවක් කරගන්නටත් කැමතියි. ඔබේ මාහැඟි පරිත්‍යාගයන් නොවන්නට, ඒ ජනතාවට සවියක් වන්නට අපිට හැකියාවක් නොලැබෙන්නට තියෙන ඉඩ බොහොම වැඩියි.
මෙවන් විපත් යළිත් මේ රටේ සිදුවෙන්න එපා කියන එක තමයි අපි හැමෝගේම එකම පැතුම. නමුත්, කවුරුන් හෝ කෙනෙක් විපතට පත්වී සිටිනවානම්, නිසැකවම අපි ඒ අය වෙනුවෙන් අපේ යුතුකම් ඉටුකරනවා. ඒක ස්ථීරයි!

වැඩ කරන ජනතාවට මීට වඩා පහසුකම් දිය යුතුමය!!!

මේ ඡායාරූපය මවිසින් ගන්නා ලද්දේ අද උදෑසන 8.15ට පමණ කොළඹ 07, කොළඹ නගර සභා පුස්තකාලය අසළ බස් නැවතුමේ සිටය. මේ වනාහි තමන්ට ඉහිලුම් නොදෙන තරම් සෙනඟක් පටවාගෙන කොල්ලුපිටියේ සිට කඩුවෙල බලා ධාවනය වෙන මාර්ග අංක 177 බස් රථයක්ය. මේ බස් රථයේ පිරී ඉතිරී එල්ලී සිටින්නේ මේ රටේ "වැඩකරන ජනතාව" ය. 

බොහෝ දෙනා දැක දැකත් නොදැක්කා සේ හිටියාට, කතා නොකෙරුවාට මේ රටේ හැම උදෑසනකම, සවසකම, අගනගරයේ හෝ තදාසන්න ප්‍රදේශවල පොදු ප්‍රවාහන සේවාවල අත්දකින්නට ලැබෙන තිත්තම තිත්ත ඇත්ත මේකය. උදේට රස්සාවට එන හවසට ගෙදර යන රජයේ/පෞද්ගලික අංශයේ සේවකයන් සාතිශය බහුතරයක් දවසට අවම වශයෙන් පැය දෙකක් තපින්නේ මේ ආකාරයේ ලොරි චැසියට බස් බොඩි ගැසූ මිහිපිට අපායවල්වල ය. උදේට හවසට ට්‍රැෆික් එකේ විඳිනා මේ දුක සමාන වන්නේ හතර අපායක විඳිනා දුකකටමය යනු මගේ කියවීමය.

රටේ සිටිනා ඇමතිවරු හතළිහකට අධික පිරිසකට වාහන මිලදී ගැනීම සඳහා පසුගිය මාස 6ක කාලයේදී වෙන්කෙරුව මුදල රුපියල් කෝටි 150කට ආසන්නය. ඒවා මිලියන වලින් ගත්තොත් 1500ක් ය. මේ වාහන ගන්නේ පාර්ලිමේන්තු මන්ත්‍රී පර්මිට් එකට පරිබාහිරව බවද මතක තියාගත යුතු ය. මයික්‍රෝ සමාගමෙන් ගෙන්නලා විකුණන ආසන 45 සුඛෝපභෝගීම බස් එකක ගාණත් යන්තම් මිලියන 15ක් ය. මේ ඇමතිවරු වෙනුවෙන් වෙන් කරපු සල්ලිවලින් AC බස් 100ක් මේ රටේ සාමාන්‍ය "වැඩ කරන මිනිස්සු" වෙනුවෙන් වෙන් කරන්න තිබුණේ ය.

කාළකණ්ණි පාලකයිනි,
තොපි ගහන ඕනෙම බද්දක් කට පියාගෙන ගෙවන්නේ මේ රටේ වැඩකරන ජනතාව ය. තොපිව නඩත්තු කරන්නේත් මේ රටේ වැඩකරන ජනතාව ය. කන හාල් ඇටෙන්, බොන කහට උගුරෙන්, ගන්න කෝල් එකෙනුත් තොපිට අම්බානකටත් ටිකක් වැඩියෙන් බදු ගෙවන්නේ මේ රටේ වැඩකරන ජනතාව ය. එහෙව් වැඩකරන ජනතාවට රස්සාවට යන එන කාලය හෝ පහසුවෙන් ගතකරන්න ලබා දෙන එක තොපේ පරම යුතුකමක් ය. තොපි එහෙම නොකරන්නේ නම් ඒ පව තොපි කන බත් ඇටයක් ගානේ තොපිට ආපසු වදිනවා ය.

මිත්‍රවරුණි, විප්ලවය ඇරඹිය යුත්තේ මේ අසාධාරණයට විරුද්ධවය!!!

විප්ලවීය ආචාරය | Revolutionary Salute

ඒ ඒ පුද්ගලයන්ගේ,
දැනුමට හා අත්දැකීම්වලට සාපේක්ෂව,
විද්‍යාත්මක පදනමකින් යුක්තව,
අමාත්‍යංශ සහ,
ඊට අයත් රාජ්‍ය ආයතන ලබාදුන්,
#යහපාලන ජනාධිපතිතුමන්ට,
මගේ විප්ලවීය ආචාරය!!!

නුඹයි පුතේ...

දාගැබ් මහා වැව් බැන්දේ නුඹයි පුතේ,
සීගිරි ගලේ කවි ලිව්වේ නුඹයි පුතේ,
නගුලෙන් එදා රජ කෙරුවේ නුඹයි පුතේ,
සවලෙන් මෙදා මඩ ගන්නේ නුඹයි පුතේ... 

මෛත්‍රීපාල සිරිසේන ජනාධිපතිතුමාගේ දේශපාලන මතවාදයට සහමුලින්ම වෙනස් මතයක් මම දැරුවත්, ලැබෙන පළවෙනි අවස්ථාවේදීම ඔවුන්ව දේශපාලනිකව පරාජය කරන්න සයිබර් අවකාශයේ මෙන්ම මහපොළොවේදීත් දිවිහිමියෙන් කටයුතු කෙරුවත්, කිසි දිනෙක ජනාධිපතිව විහිළුවට ලක්වෙන මෙවන් ඡායාරූප මගේ ෆේස්බුක් වෝල් එක හෝ පේජ් එක හරහා ලෝකයත් සමඟ බෙදානොගත්තෙමි. අවුරුදු 6කට ආසන්න මාගේ ෆේස්බුක් ජීවිතයේ ෆ්‍රෙන්ඩ්ලිස්ට් එකේ ඉන්නා සියළුම දෙනා ඒ ගැන දන්නා බව මම දන්නෙමි. ඒ දේශපාලනිකව අපි හැසිරෙන ආකාරයයි.

නමුත් ජනාධිපති මාධ්‍ය අංශයේ අඳබාලයින්, ඔවුන් විසින්ම නිකුත් කරන ලදැයි කියන මේ ඡායාරූපය ෆේස්බුක් තුළ ශෙයා කරනා ෆේස්බුක් ප්‍රොෆයිල රිපෝට් කර බ්ලොක් කිරීමේ මෙහෙයුමක නිරතවෙනවානම්, ජනවාරි 08වෙනිදාට පෙර තොපේ මහ එකාලා උඩුබිරූ "භාෂණයේ සහ අදහස් ප්‍රකාශනයේ නිදහස මෙයද?" යනුවෙන් පමණක් මම තොපෙන් අසමි. ඉන් එහා තොපත් සමඟ අපිට කතාවක් නැත.

මාවත් රිපෝට් කරලා බ්ලොක් කරපං!!!
එහෙම කරලා බලපං දිනන්නේ තොපිද නැතිනම් අපිද කියලා!!!