නුඹලා ඔය ගාණට විකිණෙන්නට ඕන මිනිස්සු නෙමේ ය!!!

අපේ රටේ තියෙන ටීවී චැනල් බලනවාට, FM රේඩියෝ අහනවාට ඒ ටීවී/FM චැනල්වලින් සල්ලි, ගෘහ භාණ්ඩ, වාහන වගේ දේවල් දෙන්න පටන් ගෙන දැං ගොඩාක් කල් ය. ඒ ඒ මාධ්‍ය නාලිකා අයිති මුදලාලිලා තම තමන්ට හැකි විදියට තමන්ව අහන බලන ඈයොන්ට ඒ සල්ලි සහ අනිත් දේවල් නිර්ලෝභීව බෙදා දෙන්නේ ය. ඒ බෙදා දෙන එක තමන්ගේ මාධ්‍ය නාලිකාවේ දවස ගානේ ප්‍රචාරය ද කරන්නේ, ඒ ඇඩ් එක දකින තවත් හුදී ජනයාට තමන්ගේ චැනල් එකම බලන්න ආස හිතවන්න ය. ඒ රේඩියෝ අහන ටීවී බලන අපේ මිනිස්සු තමන්ගේ ගෙදර, කඩේ ඉස්සරහ "මම අහන්නේ # FM" කියා අඟුරු කැටවලින් ලිව්ව බෝඩ් එල්ලුවේ, ත්‍රීවීල් එකේ/වෑන් එකේ/බස් එකේ # FM එකේ ස්ටිකර් අලව ගත්තේ අවංකවම ඒ චැනල් එක ඇහුවත් නෑහුවත් අහකයන වාසනාවක් හෝ පෑදී තමන්ට යම් වාසියක් වේ යැයි කියන අහිංසක බලාපොරොත්තුවෙන්ම ය.

රටේ ජනප්‍රියමැයි කියාගන්නා රූපවාහිනී නාලිකාවක ද රෑ 9.30 ප්‍රවෘත්ති විකාශයෙන් පසුව ඔය ආකාරයේ "චැනල් එකේ නම කිව්වත් සල්ලි බෙදන" වැඩ සටහනක් ප්‍රචාරය වෙන්නේ ය. මේ රටේ කොහේ හෝ පට්ට ඈත ඩොටේ දිස්ත්‍රික්කයක හංදියක, කඩපිළක, බස් නැවතුමක ඉන්න පිරිසක් අරගෙන (කළින් දැනුම් දී හෝ නැතුව හෝ) අහන රේඩියෝ චැනල් එක තමන්ගේ චැනල් එක නම් ඒ අහන උදවියට මුදල් තෑග්ගක් දීම මේ වැඩසටහනේ පෙළගැස්ම ය. වැඩසටහන දෙස උවමනාවෙන් බැලුවොතින් පැහැදිලිව පේන්නේ, ඒ ඉන්න අයගෙන් 90%ක්ම අවුරුදු 20-35 අතර වයස් කාණ්ඩයේ තරුණයන්/තරුණියන් බවය. අන්තිමේ චැනල් එක බලන නිසා සල්ලි දිනාගත්ත සම්පූර්ණ කණ්ඩායමම සමූහ ඡායාරූපයකට පෙනී සිට "අපි අහන්නේ # FM, # ඇහුවොත්/බැලුවොත් සල්ලි තමයි" කියමින් තමන්ට ලැබිච්ච සල්ලි ටික පෙන්නනවා ය. කොටින්ම කියනවානම්, ඒ මිනිස්සු ටික අදාළ චැනල් එකට දැනුවත්ව හෝ නොදැනුවත්ව විකිණෙනවා ය.

තමන්ගේ ක්ෂේත්‍රයෙන් කීර්ති නාමයක් සාදාහන්නා මිනිස්සු, තම තමන්ට හැකි විදියට ඒ කීර්ති නාමය විකුණන්නෝ ය. ක්‍රිකට්වලින් මේ රට ඉහළටම ඔසවා තැබූ අරවින්ද ගේ සිට ජයසූරිය හරහා සංගක්කාර දක්වාම එහෙම විකිණුනේ ය. මිනිස්සු විකිණෙන එක ගැන මට කිසිම ප්‍රශ්නයක් නැත්තේ ය. දැනුවත්ව හෝ නොදැනුවත්ව අපි හැමෝම විකිණෙන මිනිස්සු ය. ටීවී/රේඩියෝ මුදලාලිලා බලෙන් අපිව විකුණන්නේත් නැති ය. මට තියෙන එකම ප්‍රශ්නේ, ඔය ටීවී/රේඩියෝ චැනල්වලට "සාමාන්‍ය මිනිස්සු" විකිණෙන මුදල පිළිබඳව ය. "බොහෝ දිනවලදී" වැඩසටහනින් දිනන මිනිහෙක්ට ලැබෙන්නේ රුපියල් 5000ටත් වඩා අඩු මුදලක්ය. සමහර දිනවලදී රුපියල් 1000/2000 වගේ හිඟන මුදලකට ඔවුන් විකිණෙන්නේ ය. අපේ එකාලාටත් අතට දහක් දෙදහක් ලැබී ටීවී එකේ මූණ පෙන්නනවානං ඒක ලොවෙත් ඇති ය. මාධ්‍ය නාලිකාවේ මුදලාලි මේ තක්කඩි විදියට සූරාකන්නේ, අපේ මිනිසුන්ගේ ඒ නොදන්නාකම ය. මේ අකුරු ටික ලිව්වේ අන්න ඒ නොදන්නාකම වෙනුවෙන්ම ය.

මිත්‍රවරුණි, නුඹලා හිඟන මුදලකට විකිණෙන්නට ඕන පුද්ගලයෝ නෙමේ ය. නුඹලා ඊට වඩා බොහෝ වටිනා පුද්ගලයෝ ය!!!

(සියළු ඡායාරූප අන්තර්ජාලයෙන් ලබාගත් ඒවා ය. ඒවාගේ අයිතිය මුල් අයිතිකරුවන් සතු ය. පුද්ගල හඳුනාගැනීම් වැළැක්වීම සඳහා යම් යම් සංස්කරණයන් කර ඇත්තේ ය)