අමායා ලේක් පාලනාධිකාරියට ආදරයෙන්...

යාවත්කාලීන කිරීම - 2016-12-30 ප.ව 4.00

ශ්‍රී ලංකා මහවැලි අධිකාරියේ නියෝජ්‍ය අධ්‍යක්ෂක ඉංජිනේරු එල්. ආර්. හේරත් මහතාගේ අත්සනින් යුත් ලිපියකින් අමායා ලේක් හෝටලයේ පාලනාධිකාරියට මෙම ගිණිකෙළි සංදර්ශනය වහාම ක්‍රියාත්මක වන පරිදි නවත්වා දමන ලෙස නියෝග කර ඇත. ඒ අනුව එම ගිණිකෙළි සංදර්ශනය අවලංගු කළ බව අමායා ලේක් හෝටලයේ පාලනාධිකාරිය සිය ෆේස්බුක් ගිණුම ඔස්සේ ප්‍රසිද්ධ කර ඇත.

Amaya Lake, Dambulla හෝටලේ පාලනාධිකාරිය දෙසැම්බර් 31 රෑ සදා අමතක නොවන ෆන් එකක් එක්ක 2016ට සමු දී 2017ට ආයුබෝවන් කියන්නට ඉවෙන්ට් එකක් සංවිධානය කර තිබේ. ඒ ගැන අපිට කිසිදු ප්‍රශ්නයක් නැත. නමුත් ඒ සදා අමතක නොවෙන අත්දැකීම ඔවුන් ලබා දෙන්නට තීරණය කර ඇත්තේ කණ්ඩලම වැවේ වැව් පිට්ටනියේය. ඒ වගේම ඒ සදා අමතක නොවන අත්දැකීම අලංකාර මල්වෙඩි සන්දර්ශනයකින් වර්ණවත් කරන්නටද ඔවුන් කටයුතු කරන බව ඔවුන්ගේ ෆේස්බුක් පිටුවේ දමා තිබූ සටහනේ සඳහන් විය. අපිට ප්‍රශ්න පැන නඟින්නේ ඔන්න ඔතැනදීය. 

කවුඩුල්ල මින්නේරිය වනෝද්‍යානට යාබද කලාපයේ පිහිටි කණ්ඩලම වැව සහ වැව් පිටිය බොහෝ සතා සිවුපාවුන් යන එන තැනක් බව අලුතෙන් සඳහන් කිරීම අනවශ්‍ය බව අපේ කියැවීමයි. එමෙන්ම රාත්‍රියට වැව් ඉස්මත්තටත්, වැව් පිටියටත් අලි ඇතුන් මෙන්ම තවත් සතුන් විශාල ප්‍රමාණයක් පැමිණෙන බව ද Amaya Lake Resort, Dambulla හෝටලේ පාලනාධිකාරිය හොඳින්ම දන්නා බවද අපි දනිමු. 

හිතවත් මහත්වරුනි, ඔබට අවශ්‍ය ගිනිකෙළි සංදර්ශන පැවැත්වීමට අවශ්‍ය තරමේ ඉඩ කඩ සහ සුදුසු පරිසරය ඇති තැන් මේ රටේ ඕනෑ තරම් ඇත. කණ්ඩලම වැව් පිටියේ ඔය වගේ ආතල් එකක් දීමෙන් එයින් සතුටු වෙන මනුසතුන්ට වඩා දුකට කරදරයට හානියට පත්වෙන වනසතුන් ප්‍රමාණය අධික බව අපගේ කියවීමය.

හිතවත් හෝටල් පාලනාධිකාරියේ මහත්වරුනි, වනසතුන්ට දෙසැම්බර් 31, ජනවාරි 01, අප්‍රේල් 13/14 යන දවස්වල ඇති විශේෂ ආතල් නැති බව ඔබට මතක් කරමු. ඒ නිසා ඔය ගිණිකෙළි ආතල් එක කණ්ඩලමෙන් ගලවාගෙන කොළඹ/දකුණ හෝ සතුන්ට කරදරයක් නැති ඕනෙම තූත්තුකුඩියකදී පවත්වන ලෙස ඔබට ඉතාම කාරුණිකව දැනුම් දෙන්නෙමු.

සුබ අනාගතයක්...

මගේ නත්තල...

උස් තැන් දැක හැකිලෙන්නේ...

ශ්‍රී ලංකාවේ නාවික හමුදාපතිවරයා හම්බන්තොට වරාය පරිශ්‍රයේදී මාධ්‍යවේදියෙකුට පහරදෙන සිදුවීමක් අඩංගු වීඩියෝවක් සමස්ථ ශ්‍රී ලංකා ජන සමාජයම කැළඹුවේ දැනට දවස් තුන හතරකට කළිංය. රටේම අවධානය දිනාගත් ඒ සිදුවීම ගැන මගේ සත පහ එකතුවෙන්නේ මේ විදියටය.
"සද්ධන්ත දේහධාරී රැවුල්කාරයා එනවා දුටු විට අද නම් දෙකෙන් එකක් වෙන බව මම නම් දැනගත්තා" කියමින් ලියවුන පතරංග හෑලි පහුගිය ටිකේ ෆේස්බුක් එකේ ඕසෙට ශෙයා වෙනු අපිද දැක්කේය. ඒ ලියවිලි බොහෝමයක තිබ්බේ "මේ ප්‍රශ්න විසඳන රවී විජේගුණරත්නගේ විදිය" පිළිබඳ ලියවුන වීර කාව්‍ය ආකාරයේ යාං හෑලිය. ඒ රචකයන් සෑම දෙනාම අඩුවැඩි වශයෙන් කර තිබුණේ නාවික හමුදාපතිවරයාගේ සහ ආණ්ඩුවේ පිට කැසීමය.

අදාළ ස්ථානයේදී මාධ්‍යවේදියාගේ මැදිහත්වීම ගැන සහ නාවික හමුදාපතිවරයාගේ මැදිහත්වීම ගැන තියෙන්නේ පොඩි අදහසක්ය. මාධ්‍යවේදී බුවා ඒ වෙලාවේ එතනින් ටිකක් එහාට වෙලා හිටියානම් හොඳය. නාවික හමුදාපතිතුමා එදා එතනට නෑවිත්ම හිටියානම් "ගොඩාක්" හොඳය. එතනට ඇවිත් ආණ්ඩුව කිව්ව විදියට "මුහුදු කොල්ලකාරයන්ගෙන්" නැව් දෙක බේරාගන්න තරම් දක්ෂකම සහ හැකියාව තියෙන නිලධාරීන්/නැවියන් නාවික හමුදාවේ ඕනේ තරම් ඉන්නවා බව අපේ වැටහීමය.

වචනයේ පරිසමාප්ත අර්ථයෙන්ම වයිස් අද්මිරාල් රවීන්ද්‍ර විජේගුණරත්න යනු පොරක්ය. විශේෂ යාත්‍රා බලඝනය පිහිටවීම, ඒකේ නායකත්වය දැරීම, මුහුදු සටන් බොහෝ ගණනකදී ඉස්සරහින්ම සිට ඒවා මෙහෙයවීමේ සිට ඔහු මේ රට වෙනුවෙන් සිදු කළ මෙහෙය ගැන ලියන්න මේ යුනිකෝඩ් බොහොම මදිය. Most Decorated War Hero වෙන්න ලේසි පාසු බුවෙක්ට බැරිය. නමුත් ඒ කිරි බව්සරයට ගොම ලෝඩ් එකක්ම අතෑරීම රවී විජේගුණරත්න විසින්ම සිදු කළේය. කොමන් සෙන්ස් නැති එකාලා මහ පුටුවලට ගියාම ඔය වගේ ඉරට්ට ගොබ්බ දේවල් සිදුවෙන බව මිනිස්සු දැනගත යුතුය.

මේ එල්ලා තිබෙන ඡායාරූපයේ තිබෙන්නේත් නාවික හමුදාවටම අදාළ තවත් රට කළඹපු සිදුවීමක් ගැනය. ඒ සිද්ධිය උනේ මේ අවුරුද්දේම මැයි මාසයේදීය. සිද්ධිය ආයෙත් මතක් කරනවානම්, නැගෙනහිර පළාතේ මහ ඇමති බුවා ප්‍රොටෝකෝල් කේස් එකක් අල්ලගෙන නැගෙනහිර පළාතේ නාවික හමුදාවේ ලොකුම ලොක්කෙකුට බල්ලෙක්ට වගේ පළු යන්න බනින්නේ රටේ ජනමාධ්‍ය ඉඳිරියේ ප්‍රසිද්ධියේය. එදාත් නාවික හමුදාපතිවරයා විදියට හිටියේ අද ඉන්න නාවික හමුදාපතිවරයාමය. හැබැයි ප්‍රාදේශීය මාධ්‍යවේදී හාල් කෑල්ලකට "සද්ධන්ත දේහදාරී රැවුල් කාරයා" පෙන්නපු මහා පෞර්ෂය, එදා නම් අපි දැක්කේ නැතිය. අඩුම ගානේ ඒ ගැන ප්‍රකාශයක්වත් නාවික හමුදාපතිවරයාගෙන් සිදුවෙනු අපි නම් දැක්කේ නැතිය. හම්බන්තොට වරායේ සිද්ධිය අපි විග්‍රහ කරන්න ඕනේ ඔය සාම්පූර් සිද්ධියත් හිතේ තබාගෙනමය.

එදා සාම්පූර් කේස් එකේදීත් "හම්බන්තොට මහා පෞර්ෂයෙන්", "රවී විජේගුණරත්න ප්‍රශ්න විසඳන විදියෙන්", "පොඩි උන් බිලි නොදී මහ එකාම ගේම ගහන විදියෙන්" 10%ක දායකත්වයක් රවී විජේගුණරත්න දැක්වූවානම්, එදා සිංහල/දෙමළ/මුස්ලිම්/බෞද්ධ/කතෝලික/හින්දු/ඉස්ලාම් භේදයකින් තොරව සමස්ථ ශ්‍රී ලාංකික ජනතාව ඔහුගේ සහයට ඔහු වෙනුවෙන් හිටගන්නවාය. එහෙනම් Most Decorated War Hero විතරක් නොව Most Beloved War Heroes ලිස්ට් එකේත් ඉහළින්ම වැජඹෙන්න ඔහුට හැකිවෙනු බව අපේ විශ්වාසය ය. නමුත් රටේ අවාසනාවට ඒ "මහා පෞර්ෂය" 2016-මැයි-සාම්පූර්දී ඒ විදියට රැස් විහිදුවේ නැතිය. ඒ ගැන තවත් කතා කරලාද වැඩක් නැති බව අපේ හැඟීමය.

ටිබෙට් ජාතික එස්. මහින්ද හිමියන් මීට අවුරුදු බර ගාණකට කළින් මේ විදියට ලියලා තිබෙන බව මතක් කරමින් මේ ලියවිල්ල අවසන් කරනවාය.

උස් තැන් දැක හැකිලෙන්නේ
මිටි තැන් දැක පුප්පන්නේ
__________ බව සිතමින්නේ
මගේ පුතා ලොකුවෙන්නේ

හිස්තැනට සුදුසු වචනය එකතු කරගැනීම ශ්‍රී ලංකා නාවික හමුදාපති වයිස් අද්මිරාල් රවී විජේගුණරත්නටම බාරය.

YAMU TV අපිට එපා | Say NO To YAMU TV

YAMU ටීවී එක දෙබරෙට ගල් ගසලාය. There is no such thing as bad publicity කියලා කිව්වේ නිකං නොවනා බව Indi Samarajiva ඉතා හොඳින් දන්නා බව පැහැදිලිය. මේ ලියන අකුරු ටිකෙන් YAMU එකේ පබ්ලිසිටි ප්‍රොපගැන්ඩාවට මොනම විදියක හෝ සහයක් ලැබුනත් නැතත් මේ වෑයම ඔවුන්ගේ තුප්පහි මාකටිං ගැන මගේ සත පහ ඔබට කියන්නටය.

වීඩියෝ එකේ ප්‍රධාන චරිතය වන අම්පිටියේ සුමනරතන හාමුදුරුවන්ට ප්‍රශ්නයක් ඇත්තේය. ඒ ප්‍රශ්නය තියෙන්නේ අද ඊයේ ඉඳලා නෙමේය. ඉන්ටර්නෙට් එකට උන්වහන්සේ විසින්ම එකතුකරලා තියෙන වීඩියෝවල හැටියට මේ ඉඩම් පිළිබඳ ප්‍රශ්නේ තියෙන්නේ 2008/2009 කාලයේ ඉඳලාය. ඒ කාලේ ඉඳලාම උන්වහන්සේ මේ ගැන රජයේ සෑම තාරාතිරමකම නිලධාරීන්ට සහ දේශපාලක ඩෑල්වලට කියලා තියෙන බව පේන්න තියෙන්නේය.

හාමුදුරුවන්ගේ හැසිරීම ගැන ප්‍රශ්නයක් තියෙන්නේය, උන්වහන්සේ ඇග්‍රෙසිව් වැඩිය, කුණුහරුප කියන්නේය, භික්ෂුවකට නොගැලපෙන හැසිරීම් පළකරන්නේය කියන මේ කිසිම කෙනෙක් අවුරුදු ගාණක ඉඳං උන්වහන්සේ හැප්පෙන මේ ප්‍රශ්න ගැන දන්නේවත් නැතිය. ඒ ප්‍රශ්න සාමාන්‍ය මනුස්සයෙක්ව පිස්සෙක් කරන්න ප්‍රමාණවත් බව මේ විචාර දෙන කිසිවෙකුටවත් තේරෙන්නේත් නැත්තේය. නැගනහිර දිසාපතිනියට, හිටපු අමාත්‍ය කරුණා අම්මාන්ට (පොර ඇමතිකමේ ඉන්න කාලේ) මේ හාමුදුරුවෝ මේ ප්‍රශ්නය ගැනම සාමාන්‍ය ලීලාවෙන්, යහපත් සිංහලෙන් කතා කරන වීඩියෝ ඉන්ටර්නෙට් එකේම තියෙනවාය. ඒ ගැන නිසි ක්‍රියාමාර්ගයක් ගන්නේ නැතුව, අදාළ බලධාරීන් "තමංගේ එකාලගෙන් විතරක් දිගින් දිගටම පලිගන්නා විට" හැසිරිය යුතු වෙන ක්‍රමයක් තියෙනවාදැයි මම දන්නේ නැතිය. මේ හාමුදුරුවෝ කියන විදියට හේන් කොටනවා කියලා ඉඩම් සම්බන්ධව නඩු දාලා තියෙන්නේ සිංහල මිනිස්සුන්ට විතරය. ප්‍රාදේශීය ලේකම් බුවාට, දිසාපතිතුමියට පේන්නේ සිංහල මනුස්සයා අනවසරයෙන් හේනක් කොටන එක විතරමය. හැබැයි නැගෙනහිර බෞද්ධ සිද්ධස්තාන, බෞද්ධ උරුමයන් පහුගිය කාලයේ ඩෝසර් වෙච්ච හැටි, ඉඩම් කොල්ල කෑ හැටි මේ කොළඹ ඉන්න අපිත් යමරෙට දැක්කේය. ඒ කාලේ ඔය මඩකළපුවේ ප්‍රාදේශීය ලේකම් බුවා, දිසාපතිතුමිය එහෙම හිටියේ කොහේද දන්නෑය. හාමුදුරුවෝ මේ සටන් කරන්නේ ඒ තමන් දිවි ගෙවනා ප්‍රදේශයේ ඉන්න අසාධාරණයට ලක්වෙච්ච මිනිස්සු වෙනුවෙන් බව ඒ වීඩියෝ එකෙන් විතරක් මේ සිද්ධිය දැක්ක බොහෝ දෙනා නොදන්නේය.

අම්පිටියේ සුමනරතන හාමුදුරුවන්ගේ සමහර හැසිරීම් ගැන මේ ලියන මගේත් වැඩි පැහැදීමක් නැත්තේය. නමුත් උන්නාන්සේට විඳින්න වෙලා තියෙන දුක් ගැහැට උන්නාන්සේව ඒ තත්ත්වයට පත්කර ඇති බව මගේ කියවීමය. උන්නාන්සේ බුද්ධ පුත්‍රයෙක් බව සැබෑය. බුද්ධ පුත්‍රයන් මේ ආකාරයට හැසිරීම නොකළයුතු බවත් සැබෑය. නමුත් අපි හැමෝම පෘතග්ජන මනුස්සයෝය. නැගෙනහිර පළාතේ කෙළවරේ කැළෑවේ ඔය විදියට ඉන්නේ නැතුව ඌව, සබරගමුව, මධ්‍යම පළාත්වලට වැඩම කළානම් අම්පිටියේ සුමනරතන හාමුදුරුවන්ටද බොහෝම සැප සම්පතින් යුත් ජීවිතයක් ගෙවන්නට හැකිවන බව ෂුවර්ය. නමුත් උන්වහන්සේ තෝරගත්තේ ඒ ජීවිතේ නෙමේය. උන්වහන්සේ තෝරගත්තේ තමංගේ ජාතියේ එකාලා එක්ක, තමන්ගේ උරුමය රැකගෙන කැළෑවට වෙලා ඉන්න එකය. නැගෙනහිර ඉන්න සිංහල සුළුතරය වෙනුවෙන් පෙනී ඉන්න එකය. ඒ කැපකිරීම කරන්න ලේසි පහසු මනුස්සයෙක්ට බැරිය. ඒ ගැන තවත් කතා කරන්න දෙයක්ද නැතිය.

දැං කතා කරන්නට ඕනේ YAMU TV එකේ ගේම පිළිබඳවය. YAMU උන්දැලා මේ කළේ ගේමක් නැතුව හිට් වෙන්න පුළුවන් ලේසිම ක්‍රමේට ගේමට බැස්ස එකය. YAMU බුවාලාගේ මාකටිං ටාගට් එක නං ලොවෙත් ගොඩය. නමුත් ගොඩ ගිය විදිය පට්ට පජාතය. තනි වචනයෙන් කියනවානං මේවා තුප්පහි මාකටිං ය.

මේ තුප්පහි වීඩියෝ එක YAMU එකේ බුවාලා කෙරුවේ, අම්පිටියේ සුමනරතන හාමුදුරුවන් උදේ රෑ හැප්පෙන ප්‍රශ්න ගැන යන්තම් හෝ අවබෝධයක් දැනුමක් තියාගෙනද නැද්ද කියා මම දන්නේ නැතිය. ඒ කොහොම වෙතත් YAMU ආයතනයේ ලොක්කා Indi Samarajeewaට මම යෝජනාවක් කරන්න කැමතිය. ප්‍රසිද්ධ ස්ථානවල වැඩිහිටි මිනිස්සු කුණුහරුප කියාගෙන පිස්සු කෙළින අවස්ථා ගැන Review වීඩියෝ කරනවානම්, ඒක පටන් ගන්න තිබ්බේ තමන්ගේ ගෙදරින්මය. ඉන්ඩි සමරජීවගේ තාත්තා වෙන මහාචාර්ය Rohan Samarajiva මහතා පබ්ලික් ෆෝරම්වල පිස්සු කෙළින අවස්ථා රූපවාහිනී චැනල්වල, වීඩියෝවලින් සහ සජීවීව ඇස්දෙකෙන්ම අපිනම් දැකලා තියෙනවාය. ඒ මහතා ශරීර අවයව සහ ලිංගික ක්‍රියාකාරකම් ගැන ග්‍රාම්‍ය කුණුහරුප නොකිව්ව්වත්, කියන්නේ කුණුහරුප බව සිහි බුද්ධියෙන් සිටින ඕනෙම කෙනෙක් දන්නවාය. ඒ වීඩියෝ එකකට මේ ජාතියේ Review එකක් කර YAMU TV ඔස්සේ ෆේස්බුක් sponsored ප්‍රචාරයක් ලබා දෙන ලෙස යෝජනාවක් මම ඉන්ඩිට කරන්නේය. මේ වගේ තුප්පහි මාකටිං වැඩවලට වඩා ඒ වගේ වැඩක් පට්ට ජෙනුයින් බව මගේ කියවීමය.

වීඩියෝ එකට පෙනී සිට තමන්ගේ රිවීව් දී දුවන කෝච්චියට බෙල්ල තිබ්බ YAMU කාර්ය මණ්ඩලයේ බුවාලාට/බුවීලාට කියන්න තියෙන්නේ මෙච්චරය. උඹලා කෙරුවේ රස්සාවේ කොටසක්ය. උඹලාගේ වැටුප කීයක්ද කියලා මම දන්නේ නැතිය. ඒ ගාණ කීය උනත්, මීට පස්සේ හෝ සමාජ සිද්ධි ගැන විචාර දෙන්න කළින් ඒ සිද්ධි ගැන සරළ Google Search එකක් කරලා පොඩි සයිස් research එකක් කරන එක වටිනවාය. එහෙම රිසර්ච් එකක් යන්තම් හරි කළානම් උඹලා බොහෝ දෙනෙක් ඉන්ඩිගේ මේ තුප්පහි ප්ලෑන් එකට අහු නොවෙන බව මට එකෙන්ම ෂුවර්ය. ඊළඟ වතාවේවත් මොළේ පාවිච්චි කරලා වැඩ කෙරුවෝතින් හොඳක් වෙන්නේ උඹලාටමය.

දැං කරන්න තියෙන්නේ එක දෙයක් විතරය. ඒ නම් මේ තුප්පහි වීඩියෝ එක ඉවත්කරගෙන අම්පිටියේ හාමුදුරුවන්ගෙන් සමාව ගන්නා ලෙස YAMU එකට බලකරන එක පමණක්ය. ඒ වැඩේ කරනකම් YAMU වෙබ් එක වර්ජනය කරන එකය. එහෙම නැතුව ඒ වීඩියෝ එකේ පෙනී හිටි එකාලා අල්ලගෙන උංට තඩිබෑවා කියලා වැඩක් නැත්තේය. ඊළඟ සුමානේ ඉන්ඩි වෙන ගෝතයෝ කීප දෙනෙක්ව දාලා තව වීඩියෝ එකක් කරන බව ලොවෙත් ෂුවර්ය.

මේ සටහනේ අරමුණ උනෙත් YAMU එකේ තුප්පහි මාකටිංවලට මගේ පිළිකුල් සහගත විරෝධය දැක්වීමය. මේ තුප්පහි මාකටිංවලට විරෝධය දක්වන්න කියා මම ඔබෙනුත් බොහොම කරුණාවෙන් ඉල්ලා සිටිනවාය.

කියෙව්ව ඔබ සැමට බොහොම ස්තූතියි ය.

සසර සැරිසරන තෙක්...

අහස් තල පොලෝ තල,
ඔබට මට පොදුවෙලා...
හදවතින් එක් වුවත්,
ගතින් දෙදෙනෙකු‍ වෙලා..
මට බලා ඉන්න බෑ,
සියොලඟම තැවෙනවා...
සසර සැරි සරණ තෙක් ඔබ මගේ... ඔබ ‍මගේ...

සුබ ගමන් මගේ මිත්‍රයා | Good Bye Comrade!!!

සුබ ගමන් මගේ මිත්‍රයා...

දකුණ කොළඹ නුවර ඔක්කොම එකයි | All are Useless Miserable Creatures

 1. දකුණේ එවුං අහවල් චිප් එක හදද්දි නුවර එවුං මොනවද කලේ?

2. අහවල් ටෙක්නොලොජියට නුවර එවුං පේටන්ට් ගනිද්දි දකුණෙ එවුන්ට මක්කද තීන්නෙ?

3. අහවල් බිස්නස් ස්ට්‍රැටජිය කොළඹ එවුං නොගෙනාවා නං නුවරයි දකුණයි තාම ෆේස්බුක් එකේ මරා ගන්නවා"
 

මේ වගේ දේවල් වලට ආඩම්බර වෙන්න අපිට තව කාලාන්තරයක් බලාගෙන ඉන්න වෙනව බ්‍රෝ...

Pick Me එකේ ඔබත් යනවද? | Are you Going with Pick Me?

පහුගිය දවසක මගේ මිත්‍රයෙක් ශ්‍රී ලංකාවේ ජනප්‍රියම සහ ප්‍රසිද්ධම ටැක්සි සේවාවක් වෙන PickMe සේවාවෙන් කැබ් එකක් ගෙන්වා ගන්නවා රෑ 11ට විතර වගේ. ඒ එයා අඳුරන ගෑණු ළමයෙක්ට තමන්ගේ රාජකාරිය අවසන් වෙලා ගෙදර යන්න.

මගේ මිත්‍රයා කතා කරපු තැනට වාහනේ ආවම ඒකේ ඩ්‍රැයිවර් පික්මී ඇප් එකේ මොකක් හරි ඔබලා තියෙනවා. ඒ ගමන් මගේ යාළුවට SMS එකක් ඇවිත් තියෙනවා ට්‍රිප් එක ඉවරයි, ගාණ මෙච්චරයි කියලා. ඊට පස්සේ ඩ්‍රැයිවර් අලුත් ට්‍රිප් එකක් පටන්ගත්තත් මගේ යාළුවට තමන්ගේ මොබයිල් ඇප් එකෙන් ඒක ඇක්සස් කරන්න බැරිවෙලා තියෙනවා. වෙන කරන්න දෙයක් නැති නිසා, අර මම මුලින් කිව්ව ගෑණු ළමයව වාහනේ නග්ගලා මගේ මිත්‍රයා තමන් නැවතිලා ඉන්න තැනට යනවා.
හරි කතන්දරේ පටන් ගන්නේ මෙතන ඉඳන්. වාහනේ යන ගමන් ඩ්‍රැයිවර් බුවා, අර ගෑණු ළමයට "ටෝක්" කරන්න පටන් ගන්නවා. කාන්තා පාරිභෝගිකයෙක්ට ටැක්සියකදී ලබන්නට පුළුව නරකම අත්දැකීම ඒක කියලා අලුතෙන් කියන්න ඕනේ නැහැ නේ. සමහරවිට ගෑණු ළමයගේ පෙනුම, වාහනේට නැග්ග වෙලාව, තනියම ගමනක් යන එක වගේ පරිසර කාරණා ඒකට බලපාන්න ඇති. ගෑණු ළමයා මගේ යාළුවට කෝල් එකක් ගන්නවා මේ කරදරෙන් බේරෙන්න ඕනේ නිසා. නමුත් ඇත්තම කතාව නම්, මගේ යාළුවා සහ ඒ ගෑණු ළමයා ඒ වෙලාවෙදි පට්ට අසරණ වෙනවා. නමුත් දෙවියන්ගේ පිහිටෙන් ඒ ගෑණු ළමයා කරදරයක් නැතුව තමන්ගේ නවාතැනට යනවා.

ආයේ කතා දෙකක් නැහැ PickMe එකේ ඒ ඩ්‍රැයිවර් බුවා කරපු වැඩේ වැරදියි. පික්මී වගේ නමක් තියෙන සේවාවක් මිනිස්සු ලබාගන්නේ ඒ සේවාව ගැන විශ්වාසයක් තියෙන නිසා. ඒ විශ්වාසේ කුඩු පට්ටම් කරන ඔය වගේ එකාලට මඩු වලිගෙන් ගැහුවත් මදි. ඕකුන්ට විරුද්ධව නීතිය උපරිමයෙන්ම ක්‍රියාත්මක කරන එකයි කරන්න ඕනේ.

ඔය සිද්ධිය ගැන කියලා මගේ මිත්‍රයා ෆේස්බුක් සටහනකුත් තියලා තිබ්බා. පස්සේ දැනගත්ත විදියට ඔහුගේ අවශ්‍යතාවය වෙලා තියෙන්නේ මේ ගැන පික්මී ආයතනය සහ පාරිභෝගිකයෝ සහ පොදු සමාජය දැනුවත් කරන එකලු. හැබැයි ඇත්තටම අපි කරන්න ඕනේ දේ ඒකද?

පික්මී නෙමේ, මොන ටැක්සි සේවාව උනත් රස්සාවට ගන්න මිනිස්සුංව කාලා බලලා ගන්නේ නැහැ. නමුත් තමන්ගේ වාහනේ යන පාරිභෝගිකයාව බේරගන්න කරන්න ඕනේ දේවල් ගොඩක් පික්මී ඇප් එක හරහාම ලබාදීලා තියෙනවා. ඒ ඇප් එකේ තියෙනවා ෆීචර් එකක් SOS කියලා. වාහනේ ඩ්‍රැයිවර් අනවශ්‍ය විදියට හැසිරෙනවනම්, හයර් එක යන එක්කෙනාට කරන්න තියෙන්නේ ඒ SOS බටන් එක ප්‍රෙස් කරන එක විතරයි. ඒ සැනින් 24X7 වැඩකරන පික්මී කෝල් සෙන්ටර් එකට ඇලර්ට් එකක් යනවා. එයාලා එහෙම්මම කතා කරනවා ඒ අදාළ කස්ටමර්ට. කස්ටමර් ෆෝන් එක ආන්සර් නොකළොත්, එයාලා 119 සහ වාහනේ GPS අනුව ළඟම තියෙන පොලීසියට කතා කරලා දැනුවත් කරනවා අදාළ වාහනේ විස්තර සහ සිද්ධවෙන දේ ගැන. බැරිවෙලා හරි වාහනේ ඩ්‍රැයිවර් තමන්ගේ ෆෝන් එක ඕෆ් කරලනං පික්මීලට ඒ වාහනේ හොයාගන්න තියෙන එකම විදිය කස්ටමර්ගේ ෆෝන් එකේ GPS අනුව විතරයි. ඒ අනුව ගත්තම, හයර් එක යන කෙනා අතේ තමන්ගේ හයර් එක ඇක්ටිවේට් කරපු ඇප් එක තියෙන ෆෝන් එකක් තියෙන එක අනිවාර්යයි නේද.

මගේ යාළුවා වරද්ද ගන්න තැන ඕක. එයාට තිබ්බා ඩ්‍රැයිවර්ගේ ට්‍රිප් එක ඇක්සස් කරන්න ට්‍රයි කරන වෙලාවේ තමන් ට්‍රිප් එකක් දාගන්න. ඒ කිව්වේ ට්‍රිප් එකේ විස්තර තමන්ගේ අතට ගන්න. එහෙම නැත්තම් අන්තිම ඔප්ෂන් එක විදියට ඒ වාහනේම නැගලා එයත් යන්න. අනිත් හැම දේටම වඩා මනුස්ස ජීවිතේ කියන දේ වටිනවා. හයර් එක කතා කරලා දීලා එයා වෙන කොහේවත් ඉඳං හයර් එක "මොනිටර්" කළා කියලා ඇති සතේක වැඩක් නැහැ. මේ සේෆ්ටි ප්‍රොසෝඩියර් හදලා තියෙන්නේ මිනිස්සුංව ආරක්ෂා කරන්න. ඒ විදියට වැඩ නොකර කරදරයක් උනාට පස්සේ සෝෂල් මීඩියාවල අඬලා දොඩලා ස්ටේටස් දාන එක වැඩක් තියෙනවද?

මගේ යාළුවා දාපු ස්ටේටස් එකේ ගොඩක් අය කියලා තිබ්බා, අහවල් රටේ මෙහෙමයි, මේ රටේ මෙහෙමයි, මේ නීති මෙහෙමයි කියන එක. ඒ ඉතිං ඒ රටවල්වලනේ. මේ අපේ රට නේ. අපේ රට ඒ රටවල් විදියට හැදෙන එක අනාගතේදී වෙයි. එතකං අපි දැනගන්න එපායැ පරිස්සම් වෙලා ඉන්න.

මගේ ඉල්ලීම මේකයි. ඔබත් පික්මී හෝ වෙනත් ඒ වගේ කැබ් සර්විස් එකක් පාවිච්චි කරනවනම්, එයාලගේ තියෙන සේෆ්ටි ප්‍රොසීඩියර් මොනවද කියලා හරියටම දැනගෙන ඒ අනුව වැඩ කරන්න. මේ ලෝකේ ඉන්න කිසිම මිනිහෙක්ව ෂුවර් නැහැ. තමන්ට කරදරයක් උනාට පස්සේ ඒ ගැන අඬා දොඩා වැඩක් නැහැ කියන එකත් හැම තිස්සේම මතක තියාගන්න.

උසස් පෙළ ශිෂ්‍යන්ට ටැබ් | Tablet Computers for Students

මේ දවස්වල සයිබර් අවකාශයේ ජනප්‍රියම මාතෘකා දෙක තුනෙන් එකක් වෙන්නේ පහුගියදා #යහපාලන මුදල් ඇමති රවී බොසා අයවැය යෝජනාවක් විදියට ගෙනත් අතෑරිය උසස් පෙළ ළමයින්ට ටැබ් දෙන යෝජනාවය. මේ වෑයම ඒ අදහස ගැන මගේ සත පහ ඉඳිරිපත්කිරීමටය.

මේ කතා කරන්නේ ටැබ් ගැන නෙමේය. මේ කතාව ටැබ් එකෙන් එහාට දිවෙන්නක්ය. මේ කතා කරන්නේ අධ්‍යාපනය ඩිජිටල් කිරීම ගැනය. අධ්‍යාපනය ඩිජිටල් කරන වැඩේ අධ්‍යාපන අමාත්‍යංශය පටන් ගන්නේ අදට අවුරුදු 10කට විතර කළින් 2006/07 කාලයේදීය. School Net යනු ඒකේ ලොකුම ප්‍රොජෙක්ට් එකය. ඒ ප්‍රොජෙක්ට් එකේ අරමුණ වූයේ දුරස්ථ අධ්‍යාපන ක්‍රමවේදයක් හදන එකය. දිවයිනේ සමස්ථ පාසැල් 10,000කට අධික ප්‍රමාණයෙන් පාසැල් 1700කට අධික ගණනක් මේ School Net එක සමඟ සම්බන්ධ කර තිබුණේය. අධ්‍යාපන කන්ටෙන්ට් බෙදාගන්න, තමන්ගේ පාසලේ වෙබ් අඩවිය හොස්ට් කරගන්න, ඊමේල් හදාගන්න, School Net එක හරහා හැකියාව තිබුණේය. හැබැයි දැන් School Net එක නැත්තේය. ඒකට හේතුව දරාගන්න බැරි තරම් මුදලක් ඒ වෙනුවෙන් දරන්නට සිදුවීමය.දැන් ආයෙත් වෙන මුහුණුවරකින් School Net එක හෙමින් හෙමින් නැගිටින්නේය. ආණ්ඩුවට රටේ අධ්‍යාපනය ඩිජිටල් කරන්න ඇත්තම උවමනාවක් තිබුණානම් ඉස්සෙල්ලාම කළ යුතුවෙන්නේ මේ School Net එක කෙළින් කටින් හිටවලා රටේ ඉතුරු පාසල් සියල්ලටමත් ව්‍යාප්ත කරන එකය.

ටැබ්ලට් පරිගණක හෝ ලැප්ටොප් හෝ, මොනයම් හෝ ඩිජිටල් උපාංගයක් දරුවන්ට දෙන එක අත්‍යවශ්‍යම වැඩක්ය. හරි නං ඕක දිය යුතුව තිබ්බේ මීට අවුරුදු 4කට 5කටවත් පෙරය. මෙතනදී අවංකවම කල්පනා කළ යුත්තේ ටැබ් එක අරගෙන කරන්න තරම් දෙයක් අපේ උසස් පෙළ දරුවන්ට අධ්‍යාපන අමාත්‍යංශයෙන් ලබා දීලා තියෙනවාද කියන එකය. අච්චු පොත් PDF කරපු එකෙන් එහාට ඩිජිටල් උපාංග පාවිච්චි කරලා කරන්න දෙයක් තවමත් තියෙනවාද කියන එක ගැන බැලිය යුතුය. එහෙම දෙයක් තවම නැතිනම්, අඩුම ගානේ නුදුරු අනාගතයේ එහෙම අවශ්‍ය අනෙකුත් දේවල් (අවම වශයෙන් එක් එක් විෂයන් සඳහා වෙන වෙනම App) සකසාගන්න කථිකාවතක් හෝ අදාළ තැන්වල ඇති වී තිබෙනවාදැයි සොයා බැලිය යුතුය. එහෙම අදහසක්වත් නැති බව දැන දැනත්, එකපාරටම ළමයින්ට ටැබ් දීලා කරන්න යන වැඩේ මොකක්ද කියන්න මටනම් තේරෙන්නේ නැත්තේය.

රටේ අධ්‍යාපනය අලුත් මානයකට යා යුතුමය. නමුත් ඒ මානයට යා යුත්තේ නියමිත විධිමත් වැඩපිළිවෙලක් හදාගෙන ඒ අනුව පියවරෙන් පියවරය. අන්තිමට කරන්න ඕනේ වැඩේ ඉස්සෙල්ලාම කෙරුවෝතින් සිද්ධ වෙන්නේ සම්පූර්ණ වැඩේම සෙත්තපෝච්චි වෙලා යන එකය. මගේ ඉල්ලීම මේකය, ටැබ් දෙන එක හොඳ වැඩක්ය. නමුත් කිසිම සූදානමක්, වැඩ පිළිවෙලක්, මොකක්වත් නැතුව දෙන එක නං අන්තිම මරිමෝඩ වැඩක්ය. මේ #යහපාලන ආණ්ඩුව, එහෙම මරිමෝඩ වැඩ කරන්න උපන් හපන්කම් තියෙන ගොබ්බ ආණ්ඩුවක්ය. අපේ ලොකුම බයත් අන්න ඒකමය.

මගේ සත පහ ඉවරයිය. කියෙව්ව සැමට ස්තූතියි ය.

මහා නායකයාණෙනි - චිරං ජයතු!!!

මහ පොළවකි ඔබ - මුලු අහසක් උස...
අප පරමය ඔබ - තව කල්පයකට...
මහින්ද රාජපක්ෂ මහා නායකයාණෙනි,
චිරං ජයතු!!!

ජනාධිපති ඩොනල්ඩ් ට්‍රම්ප් | Trump - Make America Great Again

ට්‍රම්ප් දිනුම්!!!

ට්‍රම්ප් කතා කළේ ඇමරිකාවට.
ඊළඟ අවුරුදු 4 ඇතුළේදී ඇමරිකාව, ඇමරිකාව විදියට ගොඩ නඟන්නේ කොහොමද කියන මතවාදය ට්‍රම්ප් ඇමරිකානුවන්ට ලබා දුන්නා. බොහෝ ඇමතිකානුවන් තීරණය කළා, තමන්ට තැනක් අවශ්‍ය ලෝකය තුළ නෙමේ, ඇමරිකාව තුළමයි කියන දේ. ඒ මතවාදය දිනවන්න බහුතර ඇමරිකානුවන් කටයුතු කරලා තියෙනවා.

ජාත්‍යන්තරවාදයට වඩා ජාතිකවාදයට අවුරුදු 500කට පොඩ්ඩක් වැඩි ඉතිහාසයක් තියෙන ඇමරිකානුවනුත් එකඟයි.

ආබාධිත රණවිරුවන් වෙත,

 

අපිව රකින්න ගිහින් ආබාධිත වෙච්ච අපේම අයියලා වෙත,

උඹලා දෑත දෙපය නැති, ඇස් පේන්නැති, කන් ඇහෙන්නේ නැති, කොන්ද වාරු නැති එකාලා බවට පත් උනේ උඹලා වෙනුවෙන් මොකක්වත් කරලා නෙමේ අයියලා. මේ රටේ ජීවත් වෙච්ච ත්‍රස්තවාදයට විරුද්ධ සිංහල දෙමළ මුස්ලිම් හැම ජාතියකම මිනිස්සුන් වෙනුවෙන්, ඒ මිනිස්සුංට කරන්න බැරි දෙයක් කරන්න ගිහිනුයි උඹලා ඔය අද ඉන්න තත්ත්වෙට පත් උනේ. උඹලා ඉල්ලන දේ අසාධාරණ නැහැ. ලැබුණ තොරතුරු අනුව උඹලා ඉල්ලන දේ දීපං කියලා අනුමැතිය ලැබිලා තියෙන්නේ 2014දී. ඒ වගේම උඹලාම යුනිෆෝම් ඇඳපු සන්නද්ධ හමුදාවට ඒ නියෝග ඇවිත් තියෙන්නේ 2015දී. ඔය තොරතුරු වරදින්න තියෙන ඉඩ අඩුයි. නමුත් දවස් ගාණක් තිස්සේ අව්ව වැස්ස තකන්නේ නැතුව උඹලා පාරේ ඉන්නේ උඹලට ලැබිය යුතු දේ වෙනුවෙන්. ඒක ඉල්ලලා උඹලා පාරට බහිනකම් බුදියගෙන හිටපු #යහපාලන ආණ්ඩුව ගැන කියන්න දෙයක් නැහැ. උං ගැන නියම වෙලාවට අපි බලාගන්නං!!!

උඹලා මගෙන් අහයි මේ අමුණපු පින්තූරේ තේරුම මොකක්ද කියලා.
අද #යහපාලනේ පොලීසියෙන් හයි ප්‍රෙෂර් වතුර පාරවල් කාපු, ඔලුවෙන් ලේ පෙරෙනකම් බැටන් පාරවල් කාපු, බොම්බෙට අහුවෙලා සොත්ති වෙච්ච අත් කොට දෙකෙන් තෙත ලේන්සුව ඇස් දෙකට තියාගන්න හේතු වෙච්ච කඳුළු ගෑස් කාපු මගේ අයියලා මතක තියාගනිල්ලා, අද අපේ රටේ ජනාධිපති වෙලා ඉන්නේ තමංව මරන්න ආව එකාටත් සමාව දුන්න මිනිහෙක්...

ඔබට බොහොම ස්තූතියි | Thank You Comrades

රද්දොළුගම කණිෂ්ඨ විද්‍යාලයේ ආදි ශිෂ්‍ය සංගමය විසින් සංවිධානය කරන ලද සය සාමාජික ක්‍රිකට් තරඟාවලියක් රද්දොළුගම ක්‍රීඩාංගණයේදී පසුගිය සෙනසුරාදා පැවැත්විනි. මේ සටහන ඒ තරඟාවලිය ගැන නොවේ.

පිට්ටනියේ මෙහා වැටේ ජීවත්වන මට පිට්ටනියේ පැවැත්වෙන අටෝරාසියක් ක්‍රිකට් මැච්, ෆුට්බෝල් මැච්, සංගීත සන්දර්ශන, කානිවල් ගැන අලුතෙන් කියන්නට අවශ්‍ය නැත. පහුගිය දශක 3ක කාලයේදී මම හැදී වැඩුනේ ඔය සියල්ල අසමින්, දකිමින් සහ විඳිමිනි. නමුත් ඒ දශක 3ක කාලයේදී ඉතාම කළාතුරකින් දකින්නට ලැබෙන දෙයක් ඊයේ දිනයේදී අත්වින්දෙමි. මේ සටහන ඒ වෙනුවෙනි.

ඕනෑම උත්සවයකින් හෝ ක්‍රීඩා තරඟාවලියකින් හෝ පසුව ක්‍රීඩාංගණය පිරිසිදු කිරීමේ කටයුත්ත රද්දොළුගමට තාම අලුත් අත්දැකීමකි. බොහෝ විට සිදුවන්නේ ක්‍රීඩාංගණයේ තැන තැන දමා ඇති කුණු එක තැනකට විශාල ගොඩක් ලෙස එකතු කර දමා බොහෝ සංවිධායකයෝ අත්පිසදා ගැනීමයි. ඊළඟට සිදුවන්නේ "සුපින්වත් රද්දොළුගම ජනතාව" ඒ කුණු ගොඩට තමන්ගේ නිවෙස්වල එකතුවෙන කුණුද හොර රහසේ සහ ප්‍රසිද්ධියේ ගෙනැවිත් දැමීමයි. මෙය චිරාත් කාලයක සිට රද්දොළුගම සිදුවන දෙයයි.

තරඟාවලිය පැවති දින තත්ත්වය

කණිෂ්ඨ විද්‍යාලයේ ආදිශිෂ්‍ය සංගමේ සාමාජිකයන් මා මුලින් සඳහන් කළ පොදු කොටසෙන් වෙනස් ව්න්නේ මේ අවස්ථාවේදීය. සෙනසුරාදා දිනයේ පාන්දර 2ත් පසුවනතුරු අතිශය කාර්ය බහුල තැනක් වී තිබූ ක්‍රීඩාංගණය තුළ ඊයේ (ඉරිදා) සවස වන විට කුණු බින්දුවක් වත් නැති බව පමණක් සටහන් කිරීම මඟින් ඔවුන් වෙනස් වූයේ කවර හේතුවක් නිසාද යන වග මෙය කියවන ඔබට පැහැදිලි ඇතැයි සිතමි. කටාන ප්‍රාදේශීය සභාවෙන්වත් හරි ආකාරයකට කසළ බැහැර කිරීමක් සිදු නොකරන වේලාවකදී ඔවුන් ඒ වික්‍රමය සිදුකළේ මොන ආකාරයෙන්ද කියා විමසිය යුත්තේ ඔවුන්ගෙන්මය.

තරඟාවලියට පසු දින පැවති තත්ත්වය

ක්‍රීඩා කළත් නොකළත් ක්‍රීඩාංගණයට ආදරය කරන පුද්ගලයින් ලෙස අපට අවශ්‍ය වන්නේද මෙයයි. ඔබ ක්‍රීඩාංගණය පාවිච්චි කරන්නේ එය මේ තත්ත්වයෙන් පවතින නිසාය. භාවිතයෙන් පසුව එය පෙර තිබූ තත්ත්වයෙන් හෝ ඊටත් වඩා යහපත් තත්ත්වයෙන් යළි භාරදීමෙන් සුරැකෙන්නේ අප සැමගේ අවශ්‍යතාවයන් වෙනුවෙන් තිබෙන ක්‍රීඩාංගණයයි. රද්දොළුගමට එපමණකට නුහුරු නුපුරුදු ඒ අත්දැකීම ගෙනෙන්නට මූලිකත්වය ගත්තේ නුඹලාය. අනෙකුත් තරඟ සහ උත්සව සංවිධායකයන්ගෙන්ද අප බලාපොරොත්තුවන්නේ එපමණකි.

මාගේ හිතවත් රද්දොළුගම කණිෂ්ඨ විද්‍යාලයේ ආදිශිෂ්‍ය සාමාජික සාමාජිකාවනි, මේ අකුරු ටික ලියැවුනේ ඔබ විසින් සිදු කළ ඒ යහපත් ක්‍රියාව වෙනුවෙන් ක්‍රීඩාංගණයට ආදරය කරන අප සැමගේ හෘදයාංගම කෘතඥතාවය පළකරනු පිණිසමය.

ඔබ සැමට බොහෝම ස්තූතියි.

වේ...

කිරි සිනා සලන සඳවත අහසෙම රැඳුනාවේ,
ඉඟිමරන තරු කැළුම් අහසට නොම පෙනුනාවේ,
සිත ඈත අරන් යන විමනේ සදළු තලාවේ,
කවුළු පියන් වසනු මැනවි නෙතු කැන් හමුවේ...